الغلاف

 

الغلاف للفنانة رندى بعيني

**

Charbel Baini

Al-gurba at tawila

(Ancient migrant)

قالوا عن شربل بعيني

 فاصله وبس.. 

الى الصديق الصحافي الاديب 

والشاعر شربل بعيني

اللي بيرسم بريشة الابداع 

عصافير الصباح..

من هيك كلماتو ما بيوقفو..

بيضلّو راكعين عم يصلّو.

انت ومارق حدّو،

حافظ ع سكوتك وتحفّا..

يمكن صوت دعساتك يخزّق أحلامو.

إذا بينملو صبيعو..

بيجمد الدم بحروف الكلمه وبتصير تمثال.

وحدو براس القلم بينكوز بالتراب..

تَ يوعّي اخوتنا لبعدُن نايمين.

بيعمّر بحروفو كنايس للصلا..

فيهن كل كلمه جرن معموديه.

استاذ شربل..

عَ آخر سطر من عطائك الفكري..

لا تحط نقطة النهاية

حطّ فاصله وبس..

تَ نضلّ ناطرين الدّهشه 

لْبَعد ما كْتبتا..

مع شكري ومحبتي.

ألبير حرب ـ لبنان

**

شاعر مجدليا

ـ1ـ

يا شربل.. في بشر عن سوء نيّه

بكسر وفتح لعبوا بالهويّه

الـ فَتَحْهَا قال شاعر مجدليّا

الـ كسرها قال شاعر مجدليِّه

ـ2ـ

في بنت مراهقه كتابك وجدها

بقلبك عايشه.. وشعرَك عبدها

الصبيّه الـ حبّت الروح وجسدها

ما بدها ناس خلقاني لعددها

ما بتفرق التوبه من الْخطيِّه

ـ3ـ

جمال الحبّ من أللـه وجمالو

وكمال الكون من ضلع اللي شالو

ما بين الغنج والسحر ودلالو

في عندك حبّ مستعبد لحالو

وفي عندك حبّ عبد الجاذبيّه

ـ4ـ

يا شربل.. إنت في قلبي ولساني

زمانك طفل.. يا سابق زماني

المحبّه بذمّة الشاعر أمانه

لا إنت بعصر عايز قيس تاني

ولا بعازه لخوتا عامريّه

ـ5ـ

بتاني كتاب تفكيرك تخلّى

عن الـ صلاّ.. وما عارف ليش صلاّ

بنقطة زيت.. شعب الـ شاف أللـه

لأللـه بقول: شو خالق حياللّـه

يا رزق أللـه ع عصر الجاهليّه

ـ6ـ

رجعت وشفت لَكْ كتاب تالت

بقلبو شي ألف مجنون فالت

مجانين الدني حكيت وقالت:

أمـم من كبر حظّ العلم زالت

قبل ما يزول حرف الأبجديّه

ـ7ـ

وكتاب الرابع: الغربه الطويله

الهدف من هالمهمّه المستحيله

بشعرك ثور.. والثوره فضيله

الوطن شمشون والحاكـم دليله

وشعب مقصوص بمقص الضحيّه

جان رعد ـ لبنان

**

أمثالك قلة

   كثيرون هم الشعراء ولكن امثالك أصبحوا قلة يا شاعرنا العظيم. سالت نفسي الى من وعن اي إنسان اكتب؟ فجاوبني قلبي: تكتب الى الشاعر العظيم الذي اتحفنا بقصائده الجميلة، تكتب عن الانسان الشخص وليس الفرد كما كان يقول المعلم كمال جنبلاط، هذا الشخص الذي يوجد في داخله ضيف سعيد اكتشفه ليوجهه الى قيم الحق والخير والجمال. تكتب الى الانسان الكريم والمعطاء، تكتب عن الانسان الوفي في زمن قل فيه الوفاء، وما حبك الى عائلتك وحنينك الى ارض الوطن والى قريتك الام مزرعة الشوف الا دليل ساطع على ما أقول.

   نعم يا اخي، ويا ابن عمي شربل، دوما تلوح في سمائنا نجوم براقة لا يخفت بريقها عنا لحظة واحدة، نترقب إضاءتها بقلوب ولهانة، ونسعد بلمعانها في سمائنا فاستحقت وبكل فخر ان يرفع اسمها في عليائنا.

   لك مني يا اخ شربل ومن رابطة ال البعيني في مزرعة الشوف كل الشكر والتقدير والاحترام شاكرا بصورة خاصة العم رفيق، والأخ نواف، لأننا عرفناك من خلالهما، ومن خلال كلمات المحبة والتقدير التي يكتبانها عنك. وما اجمل العيش بين أناس احتضنوا العلم وعشقوا الحياة. والشرف الكبير لنا يا اخ شربل ان نحتضن كتبك ونعدك بأننا سنسعى جاهدين لإنشاء مكتبة تخلد الكبار والمبدعين امثالك ودمت لنا ذخرا للعطاء يا رجل المحبة والعطاء.

د. بسام البعيني

رئيس رابطة ال البعيني في مزرعة الشوف

**

شعرك بعيني

شربل.. يا عود مألّه الدوزان

فجّرت نبع العاطفه بعيني

شعرك زرع أفراح بالأحزان

شعرك بقلبي.. شعرك بعيني

للزهر مرج وللعطر خزّان

بينطلق من شربل بعيني

ولولا بيحطّوا للشعر ميزان

الدنيّي بعينِه.. وشربل بعينِه

ـ2ـ

نغمة طير.. ورفّ جناح

بين الهاتف والدّينه

لكن قلبي ما بيرتاح

تا شوف شربل بعيني

أسعد سعيد ـ لبنان

**

غربة شربل بعيني

ـ1ـ

الألفين وتمانه عَ غربه جيت

وبقيت بعيني غربة بعيني

لكن بهالرحله قبل ما مشيت

قررت بالغربه الحبايب شوف

وشوف غربة شربل بعيني

ـ2ـ

شربل انت ندر الشمع والزيت

ميله محبّه وزنبق بميله

بغربتي دشّرت عيله وبيت

و"بغربتك" بتشوفني العيله

ـ3ـ

شربل لغربتنا عملنا حساب

وشاشتك سمّيتها غربي

غربي بتجرح دمعة الغيّاب

وغربي بتمسح دمعة الغربي

أنطوان سعادة ـ لبنان

**

عندك وطن

ـ1ـ

يا شربل بعيني إنت قربي

متل قرب الروح للإنسان

عندك وطن عايش بهالغربه

وعندك.. بِـ عينيي شفت لبنان

ـ2ـ

يا عصام.. الشعر منّك بسمعو

وشربل بعيني.. متل عيني مطلعو

إنت الجبل قاعد ورايي يا عصام

حتّى السهل قدّام منّك نقشعو

ـ3ـ

يا شربل إنت محنك

رح يبقى بعيني فنك

ومهما تطول المسافات

مش ممكن إبعد عنك

د. الياس خليل ـ لبنان

**

يا شربل

يا شربل الـ بالفكر عم تبقى

بحفلة وداع منطلب نشوفك

منحب نقشع بيننا حبقه

ما بينّكر بالكون معروفك

يا طبقة الـ ما فوقها طبقه

نحنا بسيدني كلنا ضيوفك

ومنريدك بحفلة وداع تكون

ضيفنا تا تكمل الحلقه

جوزيف الهاشم ـ زغلول الدامور

**

مقتطفات من ندوة إذاعة الاذاعة

ـ1ـ

   هوْن.. بيذكّرني شربل بعيني بيعقوب صرّوف، أديبنا الكبير، اللي بيتعلّم اليوم بصفوف البكالوريا، كان صار عمرو 24 سنه وقت اللي أنشأ مجلّة المقتطف، يللي كانت من أكبر المجلاّت بزمانا. بيذكرني بجبران يللّي هوّي ونعيمي وأبو ماضي والعصبه أنشأوا مجلّة السمير، وما كان واحد منّن عمرو فوق التلاتين بعد. هالعبقريّة، كيف بتدعيه للواحد ، بسرعة عَ بكّير، إنّو يشتغل؟!.

ـ2ـ

   تنين حكيوا عن شربل بعيني. تنينُن بيعرفوه، بيعرفوه بالوجّ.. أما أنا بعرفو من خلال كتبو. شو شفت بكتب شربل بعيني؟.. شفت إنسان بيحبّ لبنان حبّ عظيم. شفت شاعر عندو لدعة الغرابة والنضارة بشعرو. شفت إنسان مش قادر ينسى ضيعتو، بعدو بيحكي عن الغبار.. ما في قصيده عندو إلاّ ما بتمرق فيها كلمة غبرة. وبيمرِّق كتير مفردات مختص فيها متل: حافي، شوالات.. هَـ الكلمات هاي يللّي بتدلّك إنّو هوّي إبن ضيعه. شفت فيه كمان الإنسان اللّي مجروح وبدّو يضحك لأنّو ما بدّو يدلق همّو ع الناس، وهون بيبقى الإنسان الكبير. الكبير بيقلّك: هموم الناس بتكفيّا. شفت فيه الإنسان يللّي صادق كل الصدق، لأنّو متناقض مع حالو، بعلمك بيحبّ الحلوه، وراضي عنها، بيحطّا مطرح أللـه، بيعملا إلهة، شويّ، بقصيده من بعد منها دغري، بتلاقي خوت عليها، تاري تناقر هوّي وياها شوي، قدّ ما هو صادق ما قدر يتصنّع، حكي بكل تناقض. من شعر شربل رح إقرا من كتاب معزوفة حب، الصفحة 53، هَـ القصيدة الـ حبّيتا:.. وهيك.. في قبل (هيك) هَـ التلات نقط، يللّي بيقولولك في كتير كلام قبل ما نوصل لهون:

  .. وْهَيْكْ صِرْنَا تْنَيْنْ

عَمْ نِشِتْرِي بِالدَّيْنْ

كِلْمِه تْفَرِّحْنَا

وْكِيفْ بَدّنَا كِيفْ

نْسَدِّد مْصَارِيفْ

رَهْنِتْ مَطَارِحْنَا

..  وْصِرْنَا عَ بَاب الْحُبّ

نُوقَفْ تَا نِسْتَعْطِي

وْيِنْبَحْ صَوْت الْقَلْبْ

بَرْكِي حَدَا بْيِعْطِي

تِذْكَارْ شِي صُورَه

نِتْنَوَّر بْنُورَا

كِيفْ مَا رِحْنَا

شِي شْفَافْ مَسْحُورَه

بْلَحْظَاتْ مَسْتُورَه

بْبَوْسِه تْرَيِّحْنَا

..  وْهَيْك صِرْنَا تْنَيْنْ

عَ دْرُوبْنَا عِينَيْنْ

بِدْمُوعْهَا سْبَحْنَا

وْنِرْكُضْ وَرَا الْمَجْهُولْ

عَ صَوْت دَقّ طْبُولْ

شَلَّعْ مَسَارِحْنَا

وْإِنْتِي وْأَنَا خْيَالَيْنْ

الْكِذْبِه تْمَرْجِحْنَا

الْعَتْمَاتْ تِمْسَحْنَا

إِنْتِي وْأَنَا طِفْلَيْنْ

مِنْ خَوْفْنَا صِحْنَا.

ـ3ـ

هَـ الروح الثوريّة اللي عند شربل، مش بس فيها ثورة، فيها طفولة عم تعمل ثورة، يعني، حلو الولد الزغير بصدقو وببراءتو يقلّك: بدّي هبِّط يللّي تعمّر غلط. مش عم يتملعن بالثورة. ثورتو فيها براءة طفل، صحيح عم بيقول الحقيقة.

ـ4ـ

متل ما طلع شربل من الضيعة، بدنا ياه يرجع ع الضيعة، ولو كانت أستراليا بدّا تزهّرلو رملاتا دهب، لازم شربل يرجع، مطرحو هون، والشعر الْـ عم يكتبو ما بيكون فيه جمال وقوةّ إلاّ إذا نبت بأرض مجدليا.

رفيق روحانا ـ لبنان

**

الخي جناح

صورة طفل يحضن أخته الصغيرة على رصيف طريق مطار بيروت الدولي، دون أن يلتفت لهما أحد.

ـ1ـ

الخي، قالوا: جناح

بحضنو الأخت ترتاح

ونسيوا يقولوا: الخي

بيصير أم وبي

بإيدو الأمل مفتاح

ـ2ـ

لا تخاف ألله كبير

وحضنك قصر دافي

نيّمتها بسرير

أوسع من مْسافه

ـ3ـ

هيك الأخوّه تكون

بعصر الظلم والقهر

العم يحكمو نيرون

الرح ينتهي بالقبر

ـ4ـ

وانتْ رح بتعيش

أكبر من البخشيش

اللي بجيبة التمساح

بكرا بينبت ريش

بجناحك وبتطير

مع اختك.. وبتصير

كل الدني أفراح

ـ5ـ

يا ريتني حدّك

تا إمسح الدمعات

عن خدّها وخدّك

وتا رجّع الساعات

وغيّر حكم خصيان

عم يسرقوا مالي

وشوّه إسم لبنان

العا قلبنا غالي

**

يوضاس

ـ1ـ

بدن ياني أنطر موتي

وموتي مش رح يتحقق

مهما خنقوا فكري وصوتي

حرفي من آلامي بيخلق

بيصفي الدمعه المجنونه

الما قدرت تحبسها عيوني

قلتلا ببحوري كوني

ولا تكوني خْيالي ع المفرق

ـ2ـ

بدّن ياني إلغي حالي

وإعلن إفلاسي للناس

خزّق كتبي.. ووزع مالي

وغرّق أحلامي بالكاس

والناس اللي مشيوا حدي

وحملوني بأيام الشدّه

قالولي بوجوهُن: هدّي

مش ممكن يربح يوضاس

**

دمعي

ـ1ـ

لو كان دمعي حكي

ما دقتْ طعم البكي

لكن دموعي سراب

بتكرُج ملبّكه

وع الخدّ في بوّاب

بيخسر المعركه

بيفتحلها الأبواب

بتعلن شريعة غاب

بتسقط المملكه

ـ2ـ

لو كان دمعي حجر

ما ضربت فيه البشر

كان الحجر بيصير

عمران وسع النظر

تا ينام طفل زغير

حامل عَ كتفو السهر

وتا إشطب التعتير

من قلب أم انقهر

ببني شي سور كبير

يوقف بوجّ القدر

ـ3ـ

لو كان دمعي حطبْ

شعّلت فيه الأدب

وعملت منّو سيف

بيشعّ منّو اللهبْ

ومحيت كلمة "حيف"

"يا حيف" مين الْـ كتبْ:

نحنا الـ حَمَيْنا الضيف

نحنا اللي صُنّا النّسَبْ

جمعنا الشتي بالصيف

وما قدرنا نجمع عرب

غبار السفر

ـ1ـ

غْبار السَّفرْ علْقانْ بِتْيابي

بْيِكْتَر لَحالو.. خَزَّق جْيابي

لَوْنُو بلَوْن الْعَتمْ والشِّحْوارْ

أَسْوَد بيخَوِّف.. جَنّ منّو كْتارْ

وْكيفْ بَدُّو يْطلّ صَوبي نْهارْ

وْكلّ العُمر أحْلام كِذّابِه

ـ2ـ

غْبارْ.. ما بْيِرْحَم بِكي الْمشْتاقْ

لِحْجارْ بَيْت زْغيرْ.. صاروا عْتاقْ

هَوْنيكْ بِـ ضَيْعَه عَ كِتْف الرِّيحْ

بَيْنا وْبَيْن الشَّمْس رَسْمتْ زيحْ

وْعَ الزِّيحْ نَصْبِتْ كَوْمة مْراجيح

تا تْمَرْجح الأشْعارْ والأشْواق

ـ3ـ

بَعْدا متلْ ما تْركِتْها مْن زْمانْ

حبّ وْضِيافِه.. وْتَضْحيه وإيمانْ

وْجيرانْ مِن ضِحْكاتُن بْيشْرُق قَمَرْ

كلْمةْ يا أَهْلا اسْتَقْبَلِتْ كلّ الْبَشَرْ

وْرَغْم الْبُغضْ والْحرْب وجْنون الْخَطَرْ

الْجِيرانْ بِقْيُوا.. تا بِقِي لُبنان

ـ4ـ

كيف بَدّي حَقِّقْ رْجُوعي

وْطَيرْ الأمَلْ غرْقان بِدْمُوعي

الإيدَيْن عَم بِتْلَوِّح بْمَنْديلْ

صرْلُو زَمَنْ بيرَدِّدْ مْواويل:

جُوعْ الْوَطَنْ مِتل الْهُموم تْقيلْ

ولُبْنانْ مُشْ عَمْ يِشْعُرْ بْجُوعي

**

تعبان

ـ1ـ

تِعْبِتْ عُيوني منْ جنون الاغتراب

ودبل الحكي بَكّير

مدري الزمن سكّر بِوجّي البابْ

مدْري القدرْ شالِحْ عَ كِتْفي النير

سنين العمر سرحت متل مزرابْ

مَيّي بالِعْها بيرْ

والبير جُرن زْغيرْ

حَدّو قَلْم وكْتابْ

ـ2ـ

ما عادْ عندي حَيْلْ

تا إغلُبْ النَّطْرَه

سامعْ صَهيل الخيلْ

جايي متل ذكرى

بتمرُقْ عَ وجّ الليل

تا تِنْمِحي بُكرا

ـ3ـ

تِعْبان ماشي والهموم تْقالْ

والرّيح عَمْ بِتْشَقلبْ سْنيني

السّرْساب صيَّرْني شبه رِجّالْ

مهموم راسي ومحترِق دِيني

لا بْلادْ تِنْدَهني.. ولا أطفالْ

لا زنود تغمرني.. تْدَفِّيني

عايش وحيد وفوق ضَهْري حْمالْ

من غربتي، يا ربّ، نجّيني

**

يتيمة

عمرها سبع سنوات لا غير، ومع ذلك أجبروها على بيع الحلوى ليلاً ونهاراً، فما كان منها، بعد أن أعياها التعب والسهر، إلا أن أسندت رأسها على "صدر الحلويات" وغطت بنوم عميق.

ـ1ـ

يا تقبريني.. السحر بجفونك

وصدر الحلو.. مَنّو حلو بدونِك

صرمايتك بشوارب الحكّام

يا زْغيرتي.. كيف الدّني بتنام

وربّ السّما ساكتْ عنْ الاجرام

تا هَيْك إنتي تْغمّضي عيونك

ـ2ـ

وين تختِكْ.. وينْ فرْشِه مْلوّنه

بْلون العيُون الْـ منْ وسخْنا مْسَوْدَنِه

صار الرّصيف فْراشْ، قدّامْ البشرْ

بيصّوروكي، بيكتبوا عنّك خبرْ

لكنْ إيدَيْهُنْ يابْسِه وِمْعَوْدَنِه

ما انمدّتْ.. ولا خلّصوكي من القدرْ

ـ3ـ

وين إنتي وينْ.. تا ضمّكْ

تا شَبّعِكْ من عاطفِةْ إِمّكْ

تا كون بَيّك.. غَنّجِكْ، قلّكْ:

جوّاتْ قلبي فارش مْحَلّكْ

نامي، يا روحي، وْطَيّري هَمِّكْ

وحوش الخليقَه طامعَه بْدَمِّكْ

**

نسر الجو

ـ1ـ

يَا نسْر الْجَوّْ

عَلِّي.. وْلا تْخَاف الْغَيْمَاتْ

وْعَ حْدُودْ الضَّوّْ

غِطّ.. وْنَفِّضْ بِالرِّيشَاتْ

وِجّ الإِيَّامْ الْمغْبَرَّه

ـ2ـ

يَا صَوْت الرِّيحْ

الْـ عَمْ تِصْفُرْ بِـ دِينَيْنَا

رْسَمْنالَكْ زِيحْ

بَيْن الدَّمْع وْعِينَيْنَا

وْبَيْن الآهَاتْ الْمِحْمَرَّه

ـ3ـ

إِنْتَ مِنْ هَوْنْ

وَقِّفْ يَا نسر وْغَنِّي

صِيَّرْنَا الْكَوْنْ

جَنِّه.. وْنَاطُور الْجَنِّه

أَرْزَات الرَّبّ الْمخْضَرَّه

**

 

كيف انطوى عمري؟

خمسون الشاعر، 10 شباط 2001

ـ1ـ

عَمْ تِرْكُض الأَيَّامْ

روزْنامْتِي تِعْبِتْ

وْتِعْبِتْ مَعَا أَوْهامْ

بِـ غُربْتِي لِعْبتْ

يا رَيْت فِيِّي نامْ

وِالنَّوْم يِنْسانِي

بِـ أَرْض عِطْشَانِه

لِدْمُوعْ عِينَيِّي

تا حَبِّبَا فِيِّي

وْغَنِّيلْهَا غْنانِي

ما سِمْعِتَا الأَحْلامْ

ـ2ـ

طُولِي.. شُو نَفْع الطُّولْ

وِالْعُرْض رِيشِةْ طَيْر؟!

جِسْمِي.. هَوَا مَحْمُولْ

وْضجْرانْ مِنِّي السَّيْرْ

وَقّفُوا السَّاعاتْ

فِزْعانْ إِنِّي شِيبْ

وْتِتْبَهْدَلْ الشَّعْراتْ

اللّي مْعَوّدِه التِّرْتِيبْ

كِيفْ انْطَوَى عُمْرِي

وْما قْدِرْت طالْ الْبَدْر؟

الْبَدْر رَحْ بِيغِيبْ

نْطُورْ يا بَدْرِي

تا وَدّعَكْ بِالشِّعْرْ

ـ3ـ

عْيُونِي.. جْرار الْوَيْلْ

وِبْكَحِّل عْيُونِي

خايِفْ صَهيلْ اللّيْلْ

ما يِعْلُن جْنُونِي

كل ما فْتَحتْ دَيِّي

بِتْلِمّ غَبْرِة ناسْ

عَمْ يِضْحَكُوا عْلَيِّي

بْقَلْبُنْ حقْد يُوضاسْ

بِالْبَحْر رِمْيُونِي

وِالْمَوْجْ ضَهْر الْخَيْلْ

خِيَّلْت عَ ظْنُونِي

وْمَقْطُوعْ مِنِّي الْحَيْلْ

ـ4ـ

غَيّرُوا إِسْمِي

وِالشَّكْل وِالْعِنْوانْ

عُمْرِي أَنا نَسْمِه

مْنِ صَرْخِتَا فِزْعانْ

لَوْ تِنْتِهِي دْرُوبِي

بِتْمُوتْ مَشْياتِي!

وْلَوْ تِنْمَحَا ذْنُوبِي

بِتْعِيشْ حَكْياتِي!

دْرُوبِي تَعَبْ إِنْسَانْ

ذْنُوبِي فَرَحْ شَيْطانْ

ما بْتِعجْبُو حْياتِي!

ـ5ـ

كلّ ما الشّمسْ تِطْلَعْ

عَمْ يِنْطِفِي نُورِي

يا عُمْر لا تِسْرَعْ

ما فَتَّحُوا زْهُوري

بَعْدُو الْبُرْعُمْ طِفْلْ

مِنْ دُونْ بَيْت.. وْأَهْلْ

مَصْمَصْ عْرُوقُو النَّحْلْ

تا يِبْسِتْ جْذُورِي

وْيا طْيُور الْفَجْرْ

زُورِي الطِّفلْ زُوري

وْلا تِفْتَحِي تِمِّكْ

وِتْفَلْفِشي هَمِّكْ

هَمِّكْ.. جْنُونْ الْهَجْرْ

وْخايِف عَلَى طْيُورِي

ـ6ـ

عَمْ يِنْدَهْ التَّابُوتْ

عَ الزَّهْر الِمْزَوْزَقْ

سْكُوتْ.. قِلْت: سْكُوتْ

ما زالْ بَدِّي مُوتْ

لَيْش تا إِخْلَقْ؟

لَيْشْ.. قِللِّي: لَيْشْ

تَا إِكْبَرْ وْإِعْتَقْ؟

وْكِذْبِه كْبِيرِه الْعَيْشْ

مْنِسْتَقِبْلُو بْزَنْبَقْ..

وْمِنْوَدّعُو بْزَنْبَقْ!

**

إنتي المرا

ـ1ـ

إنتي الْمَرا.. الْما أكبَرا

صورةْ إله مْصَغّرَه

عَمْ تِخْلَقي بْأَمْرو بَشَرْ:

ضحكة طفولِه مْنَوَّرَه

لولاكي ما تْعَمَّرْ حَجَرْ

وَيْن الخليقَه يا تُرى؟

بْتِعْطي التَّمرْ متل الشَّجَرْ

ومِتْل الورود مْزَهّرَه

ـ2ـ

قالوا المَرَا.. هيّي الدّني

هيّي الأُمُومِه.. بْتِعْتِني

بْتِغْفَى عَ إيدا الوَلْدَني

وْبِتْبُوس إيدا الْخَتْيَرَه

ـ3ـ

متْل الصَّلا مِنْقَدِّسا

وتاج الطّهْر مِنْلَبِّسا

ما بْتَعِرْفْ جْنُون الْقَسا

ولا بْتعترف بِالزَّعْبَره

ـ4ـ

قِسْنا الدّني عَ قْياسْها

وْقِسْنا الْوَفَا بِمْقياسْها

رْموش الْعيون لْباسْها

وْضِحكة شْفافا الْمَسْطَره

ـ5ـ

إنتي المرا.. اللي بْتِنْسمى

شمْس الدّني بأعلى سَما

بْحضنِك نُجُومْ  مْنِرْسِما

وما يَوم كنْتي مْكَبَّرَه

ـ6ـ

إنتي المَرَا.. وما أجملُو

وجِّك يا أمّي هالْحلُو

وْجُودِكْ يا أختي بْدَلّلُو

ويا بنْت كلّك مَقْدَرَه

ـ7ـ

إنتي الْمَرا.. يعني الكَنزْ

للتّربيِه.. صرتي رَمزْ

من دون لَفّ ولا غمزْ

مِتْلِك ما لاقوا جَوْهَرَه

ـ8ـ

إنتي الْمَرا.. يِعْني الشِّعِرْ

يِعْني الْغَزَلْ.. يِعْني الزّهرْ

مِنْغَسِّل جْريكي بْعطرْ

وْمِنَّشِّفا وْمِنْبَوْدِرا

ـ9ـ

ياما وْياما مْنِنْطِركْ

حتّى بْإيدَيْنا نْزَنِّركْ

بالحُبّ وَحْدو نْبَخِّركْ

تا يْصِيرْ إِسْمِك مَفْخَرَه

ـ10ـ

عَمْ حَلّفِكْ.. وَعِّي الْبَشَرْ

يِطْفُوا الْحرْب.. يِمْحُوا الْخَطَرْ

ما ضلّ طفل وما هَجَرْ

صِرْنا شُعوب مْطَيْشَرَه

ـ11ـ

إنتي المرا.. اللي بْحِبّها

وْبِحْلَم تا عيش بْقُربْها

وإمْشي الْعُمر عَ دربْها

منْ دون كذبْ وْشَوشَرَه

ـ12ـ

إنتي الْمَرا.. اللي بْيِظْلمِكْ

جاهِلْ غَبي.. ما بْيِفْهَمِكْ

كل ما قسي.. ما أَرْحَمِكْ

بْتِرْمي عْليْه الْمَغْفَرَه

ـ13ـ

إنتي الْمَرا.. بْيِركَعْ إلِكْ

أزغَر طفل.. أكْبَر مَلِكْ

يا مَيْمتي.. ما أجملِك

حَتّى بْتُراب الْمَقْبَرَه

**

طلة الغايب

ـ1ـ

بْطَلِّة الْغَايِبْ.. فِرْحِت السَّهْرَه

وْسِكْر الْوَتَرْ.. ما أَجْمَل السَّكْرَه

رَقَّص الأَرْزِه النَّاطْرَه بِالْجُرْد

رَجْعِةْ حَبَايِبْ طَوّلُوا السَّفْرَه

وْلُبْنان.. يَللِّي ما بْيَعْرِف حقْدْ

قَتْلُوا طْفَالُو وْشَوّهُوا الذّكْرَى

شَعْبِي أَنا.. رَحْ حَلّفُوا بِالْمَجْدْ

بِالأَرْز.. بِالدَّمَّاتْ.. وِبْصنِّينْ

يْوَحِّدْ صُفُوفُو الْيَوْم.. مُشْ بُكْرَا

ـ2ـ

تْرَكْنا الأَهْل بِبْلادْنا سْوِيِّه

أَحْباب صَفُّوا الْيَوْم خَبْرِيِّه

لا عْيُون فِيها تِقْشَعُن وِتْقُولْ:

بَلَّل صُورْكُن دَمْع عِينَيِّي

ما فِي بَسطْ مِن بَعدْكُن مَقْبُولْ

وْلا فِي مُوسيقَى تْأَثِّر عْلَيِّي

نِير الأَسَى عَمْ جَرْجرُو عَ طُولْ

طْلُوع الْفَجْر بِبْكِي عَلَى لُبْنانْ

وْعِند الْمَسَا بِبْكِي عَلَى خَيِّي

**

تركوني إفرح

 ـ1ـ

لأَولْ مَرَّه مِنْ سِنْتَيْنْ

عَمْ حِسّ بْطَعْم الْفَرْحَه

صَابِتْنِي الدِّنْيِي بِالْعَيْنْ

جَرْحِتْنِي.. وْرِجْعِتْ مِنْ شَهرْ

غَمْرِتْنِي.. وْدَاوِتْ جرْحَا

ـ2ـ

تْركُونِي إِفْرَحْ يَا نَاسْ

وْإِمْسَحْ عَنْ خَدِّي الدَّمْعَه

لَوْ بِتْدُوقُوا مرّ الْكَاسْ

اللِّي شْرِبْتُو بْعَتم الأيَّامْ

بْتِخْتِصْرُوا الْعمر بْجمْعَه!

ـ3ـ

يَا مِينْ يْرَكِّبْلِي جْنَاحْ

وِيْطَيّرْنِي بِالْعَالِي

بَدِّي إِتْغَلَّبْ عَ رْيَاحْ

نَفْخِتْلِي بْعِينَيِّي غْبَارْ

وْرِمْيِتْنِي بْأَصْعَبْ حَالِه!

ـ4ـ

وْيَا مِينْ يْغَنِّيلِي صَوْتْ

وِيْدِقِّلِّي مُوسِيقَى

فَالِتْ مِنْ إِيدَيْن الْمَوْتْ

وْعَمْ إِتْشَلْقَحْ تَحْت الشَّمْسْ

وْمُصّ النُّور مْنِ عْرُوقَا!

ـ5ـ

شَامِخْ.. مَعْ إِنِّي إِنْسَانْ

مَا بْيُؤْمِنْ بِطْلُوعْ الضَّوّْ

حَارَبْت الْحُقْد بْإِيمَانْ

سْرَقْتُو مِنْ بَخُّورْ الدَّيْرْ

وِحْرَقْتُو.. وْعِطَّرْت الْجَوّْ!

ـ6ـ

هَنُّونِي.. هَنُّوا الْمَظْلُومْ

الْـ مَا بْعمْرُو دَاق الرَّحْمِه

رِجْعِتْ تِتْجَمَّعْ الِغْيُومْ

وِتْبَشِّرْ بِمْوَاسِمْ خَيْرْ

وْتِسْكُبْ عَ الأَرْض النِّعْمِه!

**

مركب البدايه

 ـ1ـ

جَايِي إِنِتْ جَايِي

يَا مَرْكَب الْبِدَايِه

مِنْ أَحْلام وْلادْ

خِلْقُوا بْقَلْب حْكَايِه

مَا بْتَعْرِفْ نِهَايِه

تَا يْعِيشُوا بِبْلادْ

مْرَاجِيحَا بِالْعَالِي

وِنْجُومَا دَوَالِي

وِسْنِينَا أَعْيَادْ

ـ2ـ

جَايِي مِتْلِ الْمَارِدْ

وِالْكَوْن قْبَالَكْ سَاجِدْ

وِالزَّلْغُوطَه بْدِينَيْكْ

وِالنِّجْمِه الْـ مَا بْتُوعَى

عَبِّتْ جَرَّه مْنِ دْمُوعَا

تَا تْغَسِّلَّكْ إِجْرَيْكْ

يَا لْـ كِنْت الدِّنْيِي كِلاَّ

جَايِي.. وِبْقُوِّةْ أَللَّـه

حُب وْهَنَا بْعِينَيْكْ

ـ3ـ

جَايِي مْنِ الْحَرَايِقْ

نُور وعُطر وْزَنَابِقْ

وِجْبِينَكْ مِتل التَّلْجْ

وْضِحْكَات الطُّفُولِه

اللِّي مْصَادرَه وْمَقْتُولِه

صَارِتْ وِسْع الْمَرْجْ

وِالرَّايِه الْمِنْهَانِه

يَا وَطَنِي اللّبْنَانِي

مَرْفُوعَه بْأَعْلَى بُرْجْ

ـ4ـ

شُو بْتِنْفَع الطَّوَايِفْ

وِالْخَالِقْ مِنْهَا خَايِفْ

لَو تِرْكَع وْتِتْعَبَّدْ؟!

وْشُو بْتِنْفَع السَّعَادِه

بِالصَّلاَ وِالْعِبَادِه

وْشَعْبَكْ عَمْ يِتْشَرَّدْ؟!

وْعِدْنِي بْحَقّ طْفَالَكْ

وِبْصَلِيبَكْ وِهْلالَكْ

تِبْقَى حُرّ مْوَحَّدْ

تَا تْزَلْغِط لْيَالِينَا

وْتِرْجَع إنت فِينَا

يَا وَطَنِي تِتْمَجَّدْ..

**

وداع شاعر

ـ1ـ

حفْلِة وِدَاعْ؟!.. وْلَيْشْ حَتَّى نْوَدِّعَكْ

وْنِلْقِي الْقَصَايِدْ وِالْخُطَبْ عَ مَسْمَعَك

وْنِحْنَا إِذَا مْنِقْرَا قَصِيدِه كْتَبِتْهَا

عَنْ أَهْلَك.. وْعَنْ أَرْضَكْ الْـ حِبَّيْتْهَا

مَهْمَا بْعِدِتْ.. مِنْطِيرْ تَا نْصَفِّي مَعَكْ؟!

ـ2ـ

إِنْتْ شَاعِرْ.. وِالذِّكَا مِنْ مَقْلَعَكْ

وِالْقَوَافِي بْتِرْتِوِي مِنْ مَنْبَعَكْ

يِعْنِي.. إِذَا غِنَّيْتْ بِتْخَلِّي الدِّنِي

تِرْقُصْ، وْقِدَّامْ شِعْرَكْ تِنْحِنِي

وِمِتْلِ الْخيَالْ تْصِيرْ تِمْشِي وْتِتْبَعَكْ

ـ3ـ

لَمَّا الْقَدَرْ فَجَّرْ حَنَايَا مَدْمَعَكْ

وْصَفَّى بضَرْبَاتُو الْقَوِيِّه يْوَجِّعَكْ

الْتَفُّوا حبَايِبْ قَلْبَكْ وْخَبُّوكْ

بِقْلُوبُنْ.. وْمِنْ كِتِرْ مَا حَبُّوكْ

وقْفُوا مَعَكْ.. ضدّ اللِّي بَدُّو يْرَكِّعَكْ

ـ4ـ

مِنْحِبَّكْ.. وْمِنْ هَيْكْ عَمَّا نِقْشَعَكْ

بْأَحْلامْنَا الْـ بِعْيُونْنَا عَمْ تِزْرَعَكْ

إِنْت الْوَفَا.. إِنْت الصّدق وِالْحُبّْ

وْعِنْدَكْ شَهَامِه شَامْخَه بِالْقَلبْ

عَ كِلّ أَبْنَاء الْبَشَرْ عَمْ تِرْفَعَكْ

ـ5ـ

مَخْجُول حَتَّى هَـ الْقَصِيدِه سَمّعَكْ

وْكِلّ القَصَايِدْ رَاكْعَه عَ مَرْكَعَكْ

لكِنْ.. قَبل ما تْعُودْ عَ أرض الْوَطَنْ

هَـ الأَرْض يَللِّي تْلاعَبِتْ فِيهَا الْفِتَنْ

حَابِبْ تا قِلَّكْ بَسّ: أَللّـه يْكُونْ مَعَكْ.

**

زهر أسود

ـ1ـ

.. وْعَمِ تْهَنُّونِي

بْأَحْلامْ ضَاعِتْ قبل ما تُولَدْ

وْهَرْبِتْ مِنِ خْيَالِي وْمِنِ جْنُونِي

وْزَرْعِتْ وَهِمْ مَجْنُونْ بِعْيُونِي

فَرَّخْ زَهرْ أَسْوَدْ؟!

ـ2ـ

دْمُوعْ عَمْ تِكْرُجْ وَرَاهَا دْمُوعْ

وْمَا عِدْتْ أَعْرِفْ نَامْ

أُمِّي تْغَنِّيلِي:

"نَامْ يَا طَير الْحَمَامْ"

وْتِبْكِي مْقَابيلِي

وْشُوفْ بِعْيُونَا لَهِيبْ شْمُوعْ

ـ3ـ

حوَّشْتْ نَارْ وْنُورْ مِنْ عُمْرِي

وْوِزَّعتْ بَاقاتْ الزَّهر عَ النَّاسْ

النَّاسْ خَانُوا وْيَبَّسُوا زَهْرِي

هَالْـ كنتْ حَاسِب صَعب إِنُّو يْبَاسْ

تَارِي اللِّي عاش الْغدرْ

بْيِدْبَحْ بـِ ضِفْرُو.. الزَّهرْ!

ـ4ـ

يَا سَامْعِينْ الصَّوْتْ لا تْخَافُوا

صَوْتِي صَدَى حْكَاياتْ

وْيَامَا عَلَى شْفَافِي

نِيَّمْتْ غِنِّيَّاتْ

وْصِرْتْ غَنِّيهَا أَنا وْغَافِي

وِالحلم حامِلْنِي عَلَى كْتَافُو

وْلِمِّنْ فِقِتْ حِسَّيْتْ حلْمي ماتْ

مِنّو لَحالُو.. وْمَا حَدَا شَافُو!

**

جنون

ـ1ـ

جْنُونِي أَقْوَى مْنِ جْنُونُنْ

جْنُونِي أَقْوَى مْنِ جْنُونُنْ

كِل مَا جَنُّوا.. بْجِنّ زْيَادِه

وْكل مَا رَاقُوا.. مِتْل الْعَادِه

بْشُوف الدَّمْعَه بِعْيُونُنْ

ـ2ـ

جَمْعِتْنَا الصّدْفِه الْمَلْعُونِه

بْدِنْيِي.. مَا اعْتَرْفِتْ بِفْنُونِي

أَشْعَارِي.. قَالِت: لِلنَّارْ

وْأَفْكَارِي.. ملاَّ أَفْكَارْ

وْتَا حَتَّى إِتْرُكْ تِذْكَارْ

جِنَّيْت وْخزَّقْت تْيَابِي

وْصرْت إِتْزَحْلَق عَ رْكَابِي

انْبِسْطُوا كلُّنْ وْهَنُّونِي

بْعَنْتَرِيَّاتِي الْمَجْنُونِه!

ـ3ـ

عَاشَرْتُنْ.. تَارِي عَ الْعِشْرِه

النَّفْسِيِّه بْتِتْغَيَّرْ دِغْرِي

وْمَا بْيِنْفَعْنِي مَهْمَا صْرَخْتْ

وْمَهْمَا بْرَمْت.. وْمَهْمَا دخْتْ

رَحْ إِبْقَى جُوَّات بْلادُنْ

وِوْلادِي عَ شكل وْلادُنْ!

ـ4ـ

.. وْهَاكْ الْمَاضِي الْـ بَعْدُو مْعَلَّقْ

عَ مَشْنِقْة الْحلم الأَزْرَقْ

فرَّخْ قَبْلِي زْرَار زْرَار

وْبَعْدِي نَاطِرْ مَا فرَّخْتْ

وْمِتل الْـ عَامل قَبْرُو تَخْتْ

نِمتْ.. وْمُشْ حَاسِسْ بِنْهَارْ!

**

قدموس

ـ1ـ

.. وْبِتْضَلّْ يَا قدْمُوسْ

يَا سَيِّد الأَسْيَادْ

حِبْر وْقَلَمْ وِدْرُوسْ

وْدَفتريَن جْدَادْ

ـ2ـ

يَا مْعَلِّم الأَجْيَالْ

بِكْتَابَكْ قْرِينَا

كِيفْ هَـ الأَطْفَالْ

مِنْوَسِّع جْبِينَا

ـ3ـ

الْيَوْمْ صِرْنَا كْتَارْ

وْكِنْتْ وَحْدَكْ بَسّْ

تِكْتُبْ عَ ضَوِّ النَّارْ

وِتْشِعّ مِتل الشَّمْسْ

ـ4ـ

وْمَرْكَبَكْ لِلْيَوْمْ

بَعْدُو بْعِينَيْنَا

لا تْخَافْ نِحْنَا النَّوْمْ

مَا بْيِقْدر عْلَيْنَا

ـ5ـ

بْعِيدَك.. يا رَبّ الْحَرْفْ

عم زيدْ إِيمانِي

تَا أُوصْفُو.. مْنِ الْوَصفْ

رَحْ يِتْعَب لْسَانِي

ـ6ـ

تْلامِيذ مِتل الزَّهر

عَمْ يرقصوا بْعِيدَك

سِكْرُوا.. وْكان السّكرْ

مِنْ رِيحة نْبِيدَكْ

ـ7ـ

شُو بْخَبِّرُنْ عَنَّكْ

يَا بدر مَا لُو غْيَابْ؟!

رَحْ فَهِّمُنْ إِنَّكْ

مَيِّتْ إِلَكْ أَجْيَالْ

وْبَعْدَكْ مَا صِرْت تْرَابْ!

**

كمشتين فلوس

ـ1ـ

لا تْمُوتْ هَونْ بْغربتَكْ لا تْمُوتْ

وْتِتْرُك تْرَابَكْ يِلْعَنَكْ بِالْقَبْرْ

رُوحْ قَضِّي عُمْرَك بْبَيْرُوتْ

وْنَفِّض جْنَاحَكْ مِنِ غْبَارْ الْقَهْرْ

ـ2ـ

بْتِبْقَى غَرِيب بْغُربتَك يَا صَاحْ

حَتَّى وَلَوْ مِلْيَانْ بَيْتَكْ بِالْخَدَمْ

يَلّلا سَوَا نِتْعَمْشَق بْكَمْشِة رْيَاحْ

وْنِرْجَع عَلَى لُبْنَانْ.. عَ أَرْض الشَّمَمْ

ـ3ـ

يَللاّ سَوَا نِطْرُد غَريب الدَّارْ

الْـ وَلَّعْ بِـ قَلْب الدَّارْ حقد وْنَارْ

الْـ خَلاَّ السَّمَا تِسْوَدّ بِسْمُومُو

وْخَلاَّ بكِذْبُو الْجَارْ يِدْبَحْ جَارْ

ـ4ـ

نِحْنَا اللّي كِنَّا عَايْشِينْ بْعِزّْ

نِتْغَنْدَر وْنِمْشِي مِتِلْ طَاوُوسْ

غْدَرْنَا بْبَلَدْنَا وِبْشُموخ الأَرْزْ

وْبِعْنَا الْكَرَامِه بْكَمِشْتَيْنْ فْلُوسْ

ـ5ـ

عَمْ نِرْكُض نْجَمِّعْ بِـ غُرْبِتْنَا سَرَابْ

وْنِفْنِي الْعُمر وِنْضَيّعو بِالْوَهْمْ

وولادْنَا الْـ ناسيينْهُنْ خَلف الِبْوَابْ

عَمْ يِكْبَرُوا وْبِقْلُوبْهُنْ شِلاَّلْ سَمّْ

**

صوتي مبحوح

ـ1ـ

صَوْتِي مَبْحُوح وْحنْجِرْتِي

نِشْفِتْ مِنْ هَبَّات غْبَارِكْ

وِالْغِنِّيِّه الْـ كانِتْ إِنْتِي

انْدَبْحِتْ وِانْشَلْحِتْ عَ حْجَارِكْ

ردِّي الْغِنِّيِّه يَا بْلادِي

وِالضِّحْكِه لِشْفَاف زْغَارِكْ

ردِّيلِي عِزِّي وْأَمْجَادِي

تَا ضَوِّي النّجْم مْقَابِيلِكْ

صَوتِي مَبْحُوح.. وْعَمْ إِحْلَمْ

إِرْجَعْ يَا بْلادِي إِتْعَلَّمْ

دَوْزِن الْعُود وْغَنِّيلِكْ:

"يَا غْزَيِّلْ يَا بُو الْهِبَا

يَا هَاوِي يَا مْعَذِّبَا

يَلْلاَّ نِرْجَعْ عَ بْلادِي

وِنْرَجِّعْ عَهْد الصِّبَا

ـ2ـ

يَا غْزَيِّلْ قللُّو وْقللُّو:

عَلَم الأرْزِه مِنْجِلُّو

وْبَاقِيلْنَا لُبْنَانْ كِلُّو

مْنِ السَّاحِلْ حَتَّى الرُّبَى

ـ3ـ

يَا غْزَيِّلْ بِـ غُرْبِتْنَا

مَا نْسِينَاهَا لْضَيْعِتْنَا

بَشِّرْهَا بِـ رَجْعِتْنَا

قَبْل الشَّمْس الْغَارِبَه

ـ4ـ

يَا غْزَيِّلْ شُو مَا صَابَا

نِحْنَا نِحْنَا أَحْبَابَا

وْمَجْبُولِين مْنِ تْرَابَا

هَاك الأرضْ الطَّيِّبَه"

ـ5ـ

صَوْتِي مَبْحُوح.. وْكِرْمَالِكْ

رَحْ إِغْزُلْ مِنْ "أُوفِي" شَالِكْ

وْإِفْرَحْ لَمَّا نَايِي يِبْكِي

وِيْنَزِّلْ دَمْعَاتُو قْبَالِكْ

شُو بَدِّي إِحْكِي تَا إِحْكِي

عَمْ جَرِّبْ مِنْ صَخْر جْبَالِكْ

وْمِنْ قُوِّةْ إِيمَان رْجَالِكْ

إِسْرُقْ يَا بْلادِي مُوَّالِكْ:

"قَالُولي: الْمَالْ.. قِلْتِلُّنْ: مَا بَدِّي

بَدِّي الْمَجْدْ شَامِيِّه عَ خَدِّي

أَنَا مْنِ بْلادْ أَرْزَاتَا جَوَاهِرْ

وْتُرَابَا تِبِرْ عَمْ يِلْمَعْ بِـ يَدِّي"

ـ6ـ

صَوتِي مَبْحُوح.. وْآمَالِي

إِمْحِي بِالنَّغْمِه لَيَالِي

وْرَنْدِحْ شْوَيِّةْ قِرَّادِي

عَمْ تِكْبَرْ وِتْعِيش بْبَالِي

حَابِبْ غَنِّيلِك يَا بْلادِي

وْخَايِفْ مِنْ حَالِي عَ حَالِي:

"ردِّي يَا بْلادِي ردِّي

الضَّرْبَات كْتَارْ

يَا نبْع الْجَارِي حَدِّي

وْقَلْبِي عَ نَارْ

ـ7ـ

مَهْمَا صَابِكْ لا تْقُولِي

نِسْيُوا الأيَّامْ

وْنِسْيُوا عَهد الطّفُولِه

بْغُرْبِةْ أَحْلاَمْ

الرُّوح بْحُبِّكْ مَجْبُولِه

مْنِ الصَّعْب نْنَامْ

وْعَمّ نْشُوفِكْ مَقْتُولِه

بْإِيدَيْنْ الْعَارْ.."

ـ8ـ

صَوْتِي مَبْحُوح.. وْإِيمَانِي

فِيكِي يَا بْلادِي خَلاَّنِي

إِرْفَع الصَّوْت وْغَنِّيلِكْ

رَحْ إِزْرَعْ إِسْمِكْ عَ شْفَافِي

وْإِحْملْ صَلِيبِكْ عَ كْتَافِي

وْإِطْفِي بِالدَّمْعَه غَلِيلِكْ

بَرْكِي يَا بْلادِي الْحَنُونِه

بْصَوْتِي وِبْدَمْعَات عْيُونِي

بْرِدِّلِّكْ نِتْفِه مْنِ جْمِيلِكْ..

**